"كيك الفانيليا بالكريم شانتيه"

المقادير:

كوب ونص دقيق أبيض

2 معلقة صغيرة بيكنج بودر

3 بيض

ربع معلقة فانيليا

3 ملاعق كبيرة سمنة 

1 كوب سكر

 1 كوب حليب بارد

الطريقة:

1- نضع البيكنج بودر على الدقيق ونقلبه فى بعض ونتركه على جنب

2- نضع كل من البيض واللبن والسمن والسكروالفانيلا فى الخلاط ونضربهم كلهم مع بعض 

3-فى وعاء عميق نضع الخليط ثم نضع عليه الدقيق  اللى عليه البكينج بودر شوية بشوية وطبعا بضرب بالمضرب الكهربائى او اليدوى

"ملحوظة : الضرب يبدأ على خفيف بعدين تزودى السرعة"

وافضل اضربهم سوا بالمضرب لحد ما يبىق الخليط كله متماسك القوام كدة ومش مكلكع ومتماسك 

"لو عايزة تعرفى وصلتى للدرجة المطلوبة للخليط هاتى معلقة وحطى عليها الخليط ونزليه منها لو نزل كله مرة واحدة بدون تقطيع وسهل ومتماسك بنفس الوقت يبقى كدة هى دة الدرجة اللى عايزينها لقوام الخليط"

الخبيز:

1- نجيب صينية انا بستخدم المكونات دى فى صينية 22 سم وندهنها زيت ونرش عليها شوية دقيق ونتخلص من الدقيق الزيادة يادوب بس يغطى طبقة الصينية 

2-نصع الخليط فى الصينية ونهزها بالراحة علشان نتأكد إن الخليط متساوى فى الصينية

3- نكون مولعين الفرن على درجة 180 قبلها بخمس دقايق   واحط الكيك حوالى ربع ساعه او أكثر على حسب سخونية الفرن عندك وحرارته

4-احط السكينة فى النص لو لقيتها طلعت نضيفة يبقى كدة الكيك استوى وتطلعيه لو لأ يبقى اسيبها كمان خمس دقايق

5- لو الكيك كان مستوى بس لسة الوش مش محمر يبقى اطفى الفرن واولع الشواية خمس دقايق لحد ما الوش ياخد اللون الدهبى الفاتح واطفي عليها واطلعها على البوتجاز من فوق 

6- ملحوظة : الكيك ميتفتحش عليه الفرن غير بعد المدة المحددة للخبيز علاشن ميهبطش منك

7- الكيك لما يطلع يكون فى جو دافى ومفيش تيار للهواء  يعنى تكونى قافلة الشباك والباب أفضل علشان ميدخلش هواء للعجيب ويهبط 

التزيين:

1- نسيب الكيك لحد ما يبرد خاااااالص وبدع كدة نطلعه من الصينية ونحط فى طبق التقديم

2- نكون محضرين الكريم شانتيه من قبله وحاطينه فى الثلاجة  .. أنا بجيبه جاهز وبعمله زى ما مكتوب على الظرف بتاعه

3- تحطى الكريم شانتيه فى الكيس الخاص بالتزيين وتبدأى تزيينى على حسب رغبتك وممكن تزودى من فوق سكر بودرة زى اللى فى الصورة بيدى شكل حلو

ملحوظة : اللون الأورانج دة افتكاسة من عندى وهو عبارى عن تانج بالمانجا

:D :D

يلا اعملوها وورونى الإبداع بقة

Miss Menna

  1. Camera: Canon PowerShot A810
  2. Aperture: f/2.8
  3. Exposure: 1/60th
  4. Focal Length: 28mm

السلام عليكم ورحمة الله وبركاته

مع أولى أكلاتى فى المدونة

مكرونة بالبشاميل


المقادير :

1\4 كيلو لحمة مفرومة 

1\2 كيلو مكرونة أقلام

1 بصلة كبيرة

4 معلقة كبيرة زيت ذرة 

1 بيضة

2 معلقة كبيرة صلصة

1\2 كيلو حليب

1 كيس بشاميل جاهز

ملعقة صغيرة ملح

رشة فلفل سود

رشة كمون

رشة قرفة مطحونة

2 مكعب مرقة دجاج

التحضير:

1- نسلق المكرونة ونحط رشة ملح عليها ومعلقة زيت ونسيبها لحد ما تتسلق ونطفى عليها ومنرميش مية السلق هنحتاجها بعد شوية

2- لتحضير اللحمة نقطع البصلة قطع صغية او نفرمها فى الكبة ونضيف عليها الملح والفلفل والكمون والقرفة والصلصة ونضيف عليها مكعب مرقة دجاج ونسيبهم  عالنار شوية لحد ما يطرى البصل ونضيف عليها اللحمة المفرومة ونحط عليهم نص كوباية مية ونسيبها تتعصج

3-لتحضير البشاميل نحط نص كيلو الحليب ويكون دافى  على كوباية من مية السلق ودة بيديها السمك المطلوب فى الباشميل ونحط عليهم بودرة البشاميل  ونقلب لحد ما تبقى متماسكة القوام لو احتاجت تكون سايلة نضيف شوية حليب لو احتاجت تكون اكتر سامكة نضيف شوية من مية السلق لحد ما يزبط معانا البشاميل ويبقى كويس مش سايل ومش مكلكع ونضيف عليهم مكعب مرقة دجاج وبعد لما تبرد نحط عليها البيضة ونقلب كويس ونسيبها على جنب

رص الصينية:

1- اجيب الصينية وادهنها شوية زيت

2- أضرب شوية بشاميل مع المكرونة بعد ما اصفيها من المية واقلبهم فى بعض علاشن تبىق المكرونة متماسكة فى الصينية

3-احط طبقة من المكرونة وبعدين طبقة لحمة مفروم وبعدين ارش عليها طبقة من البشاميل

وبعدين طبقة لحمة مفرومة تانى وبعدها مكرونة وبعدين اصب البشاميل المتبقى على الوش كله

4-اولع الفرن على درجة 180 واحط الصينية فى الرف التانى للفرن وبعد نص ساعة افتح وابص عليها لو الجناب احمرت والسطح بدأ يتماسك يبقى اطفى الفرن واشغل الشواية عليها دقيقتين لحد ما يحمر الوش كله  لو استوت كلها واحمرت من اول مرة يبقى خلاص طافى الفرن واطلعها تبرد دقيقتين ونقطعها وتقدم ساخنة 

 وألف هنا

:)

Miss Menna

  1. Camera: Canon PowerShot A810
  2. Aperture: f/2.8
  3. Exposure: 1/60th
  4. Focal Length: 28mm